Սույն թվականի հոկտեմբերի 14-ին Գյումրու Մ. Նալբանդյանի անվան պետական մանկավարժական ինստիտուտում կայացավ «Ներառական կրթության հիմնախնդիրները» խորագրով հանրապետական գիտաժողովը՝ նվիրված ՀՀ անկախության 25-ամյակին: Գիտաժողովի նպատակն էր կրթության առանձնահատուկ պայմանների կարիք ունեցող անձանց համար հանրակրթության և բարձրագույն կրթության անհրաժեշտության, մատչելիության և հասանելիության խնդիրների ներկայացումը, քննարկումը, կարծիքների փոխանակումը, լուծումների առաջադրումը:

Գիտաժողովին մասնակցության հայտ էին ներկայացրել ոլորտի մոտ 50 մասնագետներ: Գիտաժողովի լիագումար նիստին ողջույնի խոսքով հանդես եկան ՀՀ Աշխատանքի և սոցիալական հարցերի նախարարի տեղակալ Ջեմմա Բաղդասարյանը, ԳՊՄԻ-ի ռեկտորի ԺՊ Սահակ Մինասյանը, ԳՊՄԻ-ի Ուսումնագիտական և արտաքին կապերի գծով պրոռեկտոր Անահիտ Ֆարմանյանը, Հայաստանի ամերիկյան համալսարանի փոխնախագահի տեղակալ Անահիտ Օրդյանը, Երևանի պետական լեզվահասարակագիտական համալսարանի մանկավարժական գիտությունների դոկտոր, պրոֆեսոր Հայկ Պետրոսյանը: Իսկ ԳՊՄԻ-ի Հոգեբանության ամբիոնի վարիչ, հոգեբանական գիտությունների թեկնածու, դոցենտ Կարինե Սահակյանի նախաձեռնությամբ մասնակիցներին ողջունեցին «Հայկական Կարիտաս» ԲՀԿ-ի «Էմիլի Արեգակ» կենտրոնի շահառուները: Լիագումար նիստից հետո գիտաժողովի աշխատանքները շարունակվեցին 4 բաժիններում:

Գիտաժողովի ընթացքում զեկուցված աշխատանքներին համապատասխան այն հոդվածները, որոնք կերաշխավորվեն ծրագրային հանձնաժողովի կողմից, կտպագրվեն  առանձին ժողովածուում: