Ինստիտուտի ամենաերիտասարդ ուսումնական ստորաբաժանումն է, հիմնադրվել է 1993 թ. և ուսուցչական կադրեր է պատրաստում կենսաբանություն, քիմիա, աշխարհագրություն, քարտեզագրություն և կադաստրային գործ, սերվիս, բնապահպանություն և բնօգտագործում մասնագիտություններով:  Ֆակուլտետի հիմնադիր դեկանն է պրոֆեսոր Սամվել Ալեքսանյանը, 1995-2008 թթ. ֆակուլտետը ղեկավարել է դոցենտ Սամվել Սիմոնյանը, 2008-ից ֆակուլտետի դեկանն է դոցենտ Անահիտ Գրիգորյանը: Ֆակուլտետի կայացման գործում զգալի ներդրում են ունեցել հանրաճանաչ կենսաքիմիկոսներ Ա. Գալոյանը, Գ. Գևորգյանը, Մ. Սիմոնյանը, Ն. Հակոբյանը, աշխարհագրագետներ Լ. Վալեսյանը, քիմիկոսներ Ա. Ավետիսյանը, Է. Չուխաջյանը, Լ. Մեսրոպյանը և ուրիշներ: Ֆակուլտետն ունի ամուր կապեր ու արդյունավետ համագործակցություն հանրապետության և արտերկրի մի շարք գիտական և ուսումնական կենտրոնների, Ազգային սեյսմիկ ծառայության հյուսիսային բաժանմունքի հետ: Բնագիտաաշխարհագրական ֆակուլտետի դասախոսներից շատերն իրենց գիտական մկրտությունը ստացել են ԵՊՀ-ում, ԳԱԱ կենսաքիմիայի, օրգանական և նուրբ օրգանական քիմիայի ինստիտուտներում, որտեղ այժմ էլ շարունակվում է նոր երիտասարդ գիտական կադրերի պատրաստումը: Ֆակուլտետի բազմաթիվ ուսանողներ ընդգրկված են արտերկրի կազմակերպությունների կողմից մարզի տարածքում ֆինանսավորվող մի քանի բնապահպանական և ագրոբիզնեսի ու ֆերմերային տնտեսությունների խթանման ծրագրերում, ինչպես նաև հասարակական կազմակերպություններում («Օրհուս», «Խազեր», «Ցոլինե» և այլն): Աշխարհագրության և նրա դասավանդման մեթոդիկայի ամբիոնի վարիչ աշխարհագրական գիտությունների թեկնածու, դոցենտ Լ. Մարտիրոսյանը ղեկավարում է մարզում գործող բնապահպանական «Գեոֆոն» հասարակական կազմակերպությունը:

Ֆակուլտետի կենսաբանություն և աշխարհագրություն մասնագիտություններով մագիստրատուրայում սովորողների ավարտական թեզի հետազոտական մասն իրականացվում է հանրապետության, առանձնապես Շիրակի մարզի մի շարք գիտահետազոտական ինստիտուտների, տարբեր հիմնարկությունների (ՇՄ փորձագիտական կենտրոն, Սելեկցիոն կայան, «Կարմիր խաչի» պոլիկլինիկա) լաբորատորիաներում:

Վերջին տարիներին ֆակուլտետում շարք են մտել արդիական սարքավորումներով հագեցած երեք լաբորատորիաներ, երեք մասնագիտական լսարաններ, ստեղծվել են լաբորատոր նյութերի պահպանման անհրաժեշտ պայմաններ:

Իր կազմում ֆակուլտետն ունի 3 ամբիոն:

Բնագիտաաշխարհագրական ֆակուլտետի դեկան` Անահիտ Գրիգորյան

ԱՄԲԻՈՆՆԵՐ

1. ԱՇԽԱՐՀԱԳՐՈՒԹՅԱՆ ԵՎ ՆՐԱ ԴԱՍԱՎԱՆԴՄԱՆ ՄԵԹՈԴԻԿԱՅԻ ԱՄԲԻՈՆ
2. ԿԵՆՍԱԲԱՆՈՒԹՅԱՆ, ԲՆԱՊԱՀՊԱՆՈՒԹՅԱՆ ԵՎ ՆՐԱՆՑ ԴԱՍԱՎԱՆԴՄԱՆ ՄԵԹՈԴԻԿԱՆԵՐԻ ԱՄԲԻՈՆ
3. ԴԵՂԱԳՈՐԾԱԿԱՆ ՔԻՄԻԱՅԻ, ՔԻՄԻԱՅԻ ԵՎ ՆՐԱ ԴԱՍԱՎԱՆԴՄԱՆ ՄԵԹՈԴԻԿԱՅԻ ԱՄԲԻՈՆ